LALAKI NAPUTUKAN NG DE SABOG SUGATAN - Dilasag, Aurora

Sugatan ang isang lalaki matapos itong aksidenteng maputukan ng de sabog dakong alas-onse ng gabi noong Linggo sa Bayan ng Dilasag, Aurora.

Ang biktima ay kinilalang si Jomar Vicente, 21 taong gulang, at residente ng Barangay Diagian, Dilasag, Aurora.

Nagtamo ang biktia ng malalim na sugat sa kanyang kanang hita, kili-kili at kanang bahagi ng mukha.

Ayon sa magulang ng biktima na si Ginang Jovita Vicente, matapos umanong mag-inuman ang biktima at ng bayaw nitong si Ambong Jacob, pinaglaruan umano ng dalawa ang de sabog na pag-aari ni Jacob, at aksidente itong pumutok.

Agad namang naidala sa Casiguran District Hospital ang biktima, subalit sanhi ng malalim na sugat sa hita, ay inilipat ito sa Aurora Memorial Hospital sa Barangay Reserba, Baler, Aurora upag higit na mabigyan ng karampatang lunas.

Samantala, narekober naman ng Dilasag PNP ang de sabog, at maaari umanong makasuhan ang may-ari nito alinsunod sa umiiral pa ring Election gun ban na epektibo pa hanggan sa buwan ng Hunyo 2013. (Rey S. Fernando)