NAGKAABERYANG PCOS MACHINA HINDI TIYAK KONG MAAAYOS PA AYON SA COMELEC BALER

Nagkaaberyang Precinct Count Optical Scan o PCOS machine sa isang presinto sa Bayan ng Baler, Aurora hindi parin gumagana.

Matatandaang isinagawa ang Final Testing and Sealing sa Bayan ng Baler nitong Lunes, dalawang makina na nakatalaga sa presinto sa Diego Ortiz Elementary School ang nagkaroon ng aberya, at isa dito ay tuluyan nang hindi gumana.

Ayon kay Baler Comelec Acting Election Officer Michael Pineda hindi pa nila sigurado kung maaayos at mapapagana ang isang PCOS machine na gagamitin sa darating na midterm election sa Mayo 13.

Sinabi ni Pineda na naireport at sumulat na sila sa National Support Center para remedyuhan ang kakulangan sa makina.

Paliwanag pa ni Pineda na walang dapat ikabahala ang publiko sakaling hindi mapalitan ang nagkaaberyang PCOS.

Mayroon naman aniyang contingency plan ang comelec na maaaring gawin sa panahon ng halalan. Maaari umanong isagawa ang manual voting sa presinto na may aberya ang makina, maaari din umanong gamitin ang PCOS machine ng kabilang presinto o dikaya ay dadalahin ng Board of Election Inspector (BEI) sa Munisipyo ang mga balota at ballot box at doon isasagawa ang pagbibilang sa makina.