Lider Organisador ng PAMANA, hinaras ng 15 miyembro ng Army sa Aurora

Hinaras ng mga pinaghihinalaang miyembro ng 56^th IB Philippine Army na naka base sa Barangay Calabuanan, Baler, Aurora ang isang Lider Organisador ng Samahan ng mga Kababaihan sa Aurora (SAMAKA) na nasa ilalim ng Panlalawigang Alyansa ng mga Magbubukid sa Aurora (PAMANA).

Base sa isinagawang imbestigasyon ng Multi-Sectoral Action Group of Aurora - Human Rights/Quick Response Team (HR/QRT) Committee at base narin sa salaysay ng biktima na hindi muna nagpabanggit ng kanyang pangalan, humigit kumulang ika-11:00 ng gabi hanggang ika-2:00 ng madaling araw noong Enero 16 at 17, 2014, nakita umano ng mga kapitbahay  nito na pinalibutan umano ang bahay ng biktima sa Sitio Ilaya, Barangay Zabali, Baler, Aurora ng tinatayang nasa 15 unipormadong sundalo habang ito ay natutulog.

Ayon pa sa grupo ng MSAG HR/QRT, pumasok umano ang ilang pinaghihinalaang miyembro ng Army sa loob ng bakuran ng biktima at sumilip ang mga ito sa siwang ng bahay ng biktima habang ang iba naman ay pawang mga nakadapa sa labas ng bakuran, na nagtagal ng halos 3 oras bago mabilis na umalis ang mga ito.

Dagdag pa ng MSAG HR/QRT, bago maganap ang pangyayari napansin umano ng ilang residente sa lugar ang pag-alis ng isang lalaki gamit ang motorsiklo na walang plaka na palaging ginagamit umano ng isang nagngangalang Jomar Glemao. Ayon pa sa ilang residente dumating si Glemao sa lugar noong araw ng linggo ng hapon ika-12 ng Enero 2014 at ayon sa nakausap nito, siya ay kamag-anak ng pamilyang Nortes at napag-alaman pa na ito ay isang CAFGU na ina-sign sa liblib na lugar upang magsagawa ng intelligence work at siya ay naka destino sa kampo ng 56^th IB sa km.36 sa bayan ng Maria Aurora na derektang nagrereport sa Himpilan ng 56^th IB sa Calabuanan (Arnel M. Turzar & MSAG HR/QRT).