Pinabulaanan ng Public
Interest Law Center (PILC) ang mga paninira at pananakot na ginagawa ng di
umanoy mga nagpapakilalang tauhan ng Aurora Pacific Economic Zone and Freeport
Authority (APECO) sa bayan ng Casiguran.
Sinasabi ng ilang mga
petitioner laban sa APECO na may mga nagpapakilalang kinatawan ng APECO na
naglilibot sa mga Barangay na sakop ng proyekto at nagpapakalat ng mapanlinlang
na balita na may mga kasamahan umano ang mga petitioner na itinatanggi na sila
ay pumirma sa sinumpaang salaysay na isinumite sa Korte Suprema bilang suporta
sa petesyon.
Ito umano ay isang malaking
kasinungalingan taliwas sa ipinahayag ng PILC sa pamamagitan ng isang bukas na
liham noong magkaroon ng Primer Launching sa Bianoan, Casiguran, Aurora na
pinamagatang “Kaunlaran para Kanino” noong nakaraang Sabado, ika-27 ng
Setyembre 2014 na pinangungahan ng PILC at dinaluhan naman ng iba’t ibang
samahan katulad ng JPAG, Bataris, AKAP at PAMANA, ganoon din ang PIGLAS-CA at
mga anti-apeco mula sa hanay ng mga Magsasaka, Mangingisda at katutubo sa
Casiguran na derektang apektado ng proyekto na umabot sa may 350 katao ang
nakiisa sa programa.
Base sa liham, sinabi ng
PILC na kahit minsan ay hindi umano kwinestyon ng APECO sa Korte Suprema ang
katotohanan ng pagkatao ng mga residente ng Casiguran na nagsampa ng petisyon.
Maging ang mga sinumpaang salaysay at mga pirma sa petisyon ay hindi naging
usapin sa Korte Suprema, taliwas dito umano ang ipinapakalat na balita sa mga
mamamayan doon para sila ay takutin.
Dagdag pa ng PILC na ang mga
hakbang na ito ng pananakot ay despiradong mga hakbang sa harap ng patuloy at
malakas na pagtutol ng mga mamamayan ng Casiguran laban sa APECO. (Arnel M. Turzar)
Comments
Post a Comment