Tatlong bagong destinasyong
pang-turismo na naman ang natagpuan sa bayan ng Maria Aurora, Aurora na magsisilbing
bagong atraksiyon para sa mga darayong turista dito sa lalawigan ng Aurora.
Ayon kay Ginoong Noel Dulay,
tourism coordinator ng bayan ng Maria Aurora, tatlong water falls ang katatapos
lamang nilang i-explore na nasa bahagi ng Brgy. Villa, Maria Aurora na sakop ng
Aurora Memorial National Park.
Pinangalanan na nilang High
Drop at Hubot falls ang dalawa sa mga ito upang magkaroon ng sariling
pagkakakilanlan di gaya ng mga karaniwang talon na water falls ang karaniwan
ding katawagan.
Dahil sa mga taglay na
mala-paraisong yaman ng Maria Aurora, tinawag na ito ngayon bilang “Gateway to
Paradise, Home of Natural Treasure” kung saan maraming potensiyal na gawing
tourist attractions.
Ayon pa kay Dulay, binabalak
nila katuwang ang Provincial Tourism Office na muling pasiglahin ang Aurora
Memorial National Park at gisingin ang natutulog na potensiyal at sigla ng
Barangay Villa na winasak ng matinding kalamidad sampung taon na ang
nakakaraan. Layunin naman nito na sa pagsapit ng susunod na taon ay mabilang na
sa regular na ruta ng mga turista ang lugar na ito na siyang naging simula ng
pag-unlad na Aurora. (Ronaldo A. Ramos)
Comments
Post a Comment