Purok Yakal 2, Barangay Paltic sa Dingalan, nakaranas na naman ng pagbaha kahapon

Muli na namang nakaranas ng pagbaha kahapon (Sept. 9) dakong alas-11:43 ng umaga ang Purok Yakal 2, Barangay Paltic, Dingalan, Aurora dahil sa halos kalahating oras na walang hupay na pagbuhos ng ulan.

Ayon sa isang residente sa nasabing lugar na si Gng. Menchie Delos Reyes David, matagal nang suliranin ang pagbaha sa kanilang lugar kahit na wala namang sama ng panahon. Basta aniya tumagal ng halos kalahating oras ang pagbuhos ng ulan, asahan ang ganitong pagbaha.

Reklamo nila na kaya umaapaw ang tubig dahil sa hindi maayos na daluyan ng nito. Mayroon naman anilang imbornal, subalit hindi naman umano nito kaya ang volume ng tubig na nanggagaling sa kabundukan.

May maliliit na kanal din umanong ginawa ang Department of Public Works and Highway (DPWH) subalit lalo lamang anila itong nakakasama sa daloy ng tubig dahil napupuno ito at umiikot pabalik ang tubig papunta sa mga kabahayan.

Kaya naman, panawagan nila sa mga ahensyang nakakasakop sa ganitong suliranin, lalo na sa Lokal na Pamahalaan ng Dingalan na aksyonan ito at gawan ng paraan sa lalaong madaling panahon.

Matagal na anila itong pinapanawagan, subalit tila walang ginagawang aksyon ang mga kinauukulan. (Arnel M. Turzar)