Qualified Theft, kasong isinampa laban sa 5 suspek sa pamimitas ng niyog sa Dipaculao

Qualified Theft ang isinampang kaso sa Provincial Prosecutors Office sa Barangay Suklayin, Baler, Aurora noong Lunes (Sept. 2) laban sa limang suspek na sina Teodorico Armanda y Carrasco, 71 taong gulang; Daisy Lanillo y Armanda, 47 taong gulang; Jonathan Armanda y Abrero, 43 taong gulang; Armie Armanda y Abrero, 31 taong gulang; at Regie Macabontoc y Seradoy, 33 taong gulang, kapwa mga residente ng Barangay Diarabasin at North Poblacion, Dipaculao, Aurora.

Base sa report ng Dipaculao PNP, umaga noong August 31, 2013 dinakip nila ang lima makaraang makatanggap sila ng tawag mula sa Mrs. Valeriana S. Fabrigas na nagpitas ng bunga ng niyog ang mga ito sa loob ng lupang pag-mamay-ari umano ni Mrs. Rosita Tan y Abrero sa Sitio Dibunnong, Barangay Diarabasin.

Agad na nagtungo sa lugar ang mga otoridad para alamin ang nasabing report sa pangunguna ni SPO4 Julito V. Tangson-MESPO, at aktong nakita ng mga ito ang pinitas na niyog ng mga suspek na umabot sa may 1,500 piraso na nagkakahalaga ng Php. 9,000.

Agad na dinakip ang limang suspek noong araw ding iyon. At pormal nang sinampahan ng kaso ang mga ito noong Lunes at kasalukuyan silang nakakulong sa Panlalawigang Piitan ng Aurora. (Arnel M. Turzar)